ਅਮ੍ਰਿਤਾ ਪ੍ਰੀਤਮ ਰਚਿਤ ਨਾਵਲਾਂ ਦੇ ਨਾਰੀ ਪਾਤਰ

ਮਨੁੱਖ ਨੂੰ ਚੇਤਨਾਯੁਕਤ ਹੋਣ ਕਰਕੇ ਇਸ ਕਾਇਨਾਤ ਦਾ ਸਭ ਤੋਂ ਸ੍ਰੇਸ਼ਟ ਪ੍ਰਾਣੀ ਹੋਣ ਦਾ ਮਾਣ ਪ੍ਰਾਪਤ ਹੈ ਅਤੇ ਨਾਰੀ ਦੀ ਗਣਨਾ ਪ੍ਰਕ੍ਰਿਤੀ ਦੇ ਉਸ ਪ੍ਰਵਰਗ ਵਿਚ ਪ੍ਰਵਾਨਿਤ ਹੈ ਜਿਸਨੂੰ ਮਾਨਵ ਕਿਹਾ ਜਾਂਦਾ ਹੈ। ਨਾਰੀ ਮੁੱਢ ਕਦੀਮ ਤੋਂ ਮਨੁੱਖ ਜਾਤੀ ਦਾ ਇਕ ਕੁਦਰਤੀ ਅਤੇ ਲਾਜ਼ਮੀ ਅੰਗ ਹੈ। ਮਨੁੱਖੀ ਪ੍ਰਵਰਗ ਦੇ ਅੰਤਰਗਤ ਨਾਰੀ ਅਤੇ ਮਰਦ ਪ੍ਰਕ੍ਰਿਤੀ ਦੀਆਂ ਦੇ ਅਜਿਹੀਆਂ ਹੋਂਦਾਂ ਹਨ ਜੋ ਇਕ ਦੂਜੇ ਨਾਲ ਪੂਰਕ ਅਤੇ ਅਨਿੱਖੜ ਰਿਸ਼ਤੇ ਵਿਚ ਬੱਝੀਆਂ ਹੋਈਆਂ ਹਨ। ਪ੍ਰਕ੍ਰਿਤਕ ਜਗਤ ਦੇ ਵੱਖਰੇ-ਵੱਖਰੇ ਪ੍ਰਵਰਗਾਂ ਦੇ ਅੰਤਰਗਤ ਹਰੇਕ ਜੀਵਕ ਹੋਂਦ ਜੋੜਿਆਂ ਵਿੱਚ ਹੈ। ਇਹ ਜੋੜੇ ਪ੍ਰਕ੍ਰਿਤਕ ਨੇਮ ਦੇ ਅੰਤਰਗਤ ਆਪਣੀ ਨਸਲ ਦੀ ਉਤਪਤੀ ਵਿੱਚ ਸਹਾਈ ਹੁੰਦੇ ਹਨ। ਬਿਲਕੁਲ ਇਸੇ ਤਰ੍ਹਾਂ ਮਨੁੱਖੀ ਨਸਲ ਦੀ ਨਿਰੰਤਰਤਾ ਦੇ ਇਸ ਅਮਲ ਵਿਚ ਨਾਰੀ ਅਤੇ ਮਰਦ ਹੋਂਦ ਇਕ ਦੂਜੇ ਨਾਲ ਬੱਝੀ ਹੋਈ ਹੈ। ਅਸਲ ਵਿੱਚ ਨਾਰੀ ਮਰਦ ਸੰਬੰਧ ਅਤੇ ਉਸਦੇ ਭਿੰਨ-ਭਿੰਨ ਰੂਪ ਮਾਨਵੀ ਸ੍ਰਿਸ਼ਟੀ ਦੇ ਸਥਾਈਤਵ ਅਤੇ ਉਸਦੇ ਸਮਾਜਿਕ ਵਿਕਾਸ ਲਈ ਜ਼ਰੂਰੀ ਹਨ।